- O Programa de Voluntariado Dixital (VOLDIX) en colaboración con NTT DATA, poñen en marcha unha iniciativa solidaria para achegar a tecnoloxía ás entidades sen ánimo de lucro.
- Esta colaboración materialízase a través da doazón dun total de 22 equipos informáticos á Asociación Galega para a Axuda a Enfermos con Demencia, tipo Alzheimer (Agadea) e a Asociación “Ecos do Sur”.
A Axencia para a Modernización Tecnolóxica de Galicia (Amtega) únese á consultora tecnolóxica NTT DATA para reducir a fenda dixital de colectivos en risco de exclusión social. Esta colaboración consistiu na doazón de 22 equipos realizada a través do Programa de Voluntariado Dixital (VOLDIX) e permitirá a posta en marcha de proxectos e iniciativas que buscan aproveitar o potencial da tecnoloxía para a mellora da calidade de vida, así como inclusión no ecosistema dixital.
Concretamente desde a Asociación Galega para a Axuda a Enfermos con Demencia, tipo Alzheimer (Agadea) están a por en marcha o proxecto “Conectando Xeracións: Competencias dixitais para o envellecemento activo en persoas maiores con Alzheimer”. O seu obxectivo é mellorar as capacidades dixitais deste colectivo co apoio de mozos/as voluntarios, promovendo así que se reduza o risco de illamento social e xerando un espazo de aprendizaxe e crecemento mutuo.
Pola súa banda, a Asociación “Ecos do Sur” conta con varios programas destinados á inclusión das persoas migrantes a través da colaboración de persoas voluntarias que realizan atencións individualizadas, formacións, actividades sociolaborais e educativas. Estas actividades están enfocadas á alfabetización dixital, erradicación da fenda dixital, inserción laboral, ensino de linguas oficiais ou a realización xestións administrativas.
Programa de Voluntariado Dixital
Esta doazón, enmarcada no Programa de Voluntariado Dixital (VOLDIX), promovido pola Axencia para a Modernización Tecnolóxica de Galicia e a Dirección Xeral de Xuventude, Participación e Voluntariado da Xunta de Galicia, reforza a oferta de formación dixital para a mellora das competencias dixitais no conxunto da sociedade galega e reducir a fenda de acceso aos servizos dixitais.
A través do programa, a Axencia autonómica artella o esforzo e as necesidades dos máis de 1.000 aliados dixitais cos que conta na actualidade e entre os que se atopa NTT DATA, que leva colaborando coa Xunta de Galicia a través do Programa de Voluntariado Dixital desde 2012 e como aliado dixital desde 2016.
Neste ecosistema dixital formado por persoas voluntarias, organismos colaboradores e entidades públicas e privadas trabállase para consolidar a capacitación dixital da cidadanía, así como na promoción e divulgación dos servizos e beneficios da Sociedade da Información.