- Foi practicamente a única das tres liñas de axuda do programa estatal que rexistrou demanda, a pesar da ampliación do prazo de solicitudes e do reforzo da difusión
- Os resultados confirman a falta de adecuación dos obxectivos dos fondos ao que realmente precisa a poboación e as empresas da Comunidade
A última convocatoria do Programa estatal UNICO, que forma parte do Plan de Recuperación, Transformación e Resiliencia, pechouse en Galicia con 1.212 solicitudes de bonos dixitais, para colectivos vulnerables; 6 para a mellora de conectividade de empresas situadas en polígonos industriais e ningunha para edificios. Estes resultados confirman a falta de adecuación dos obxectivos dos fondos ao que realmente precisa a poboación e as empresas da Comunidade, unha reivindicación que se trasladou desde as comunidades autónomas en reiteradas ocasións.
Ademais de reforzar a difusión e ampliar o prazo de solicitude para as tres liñas de axuda o pasado mes de setembro, a convocatoria de 2024 rexistrou unha baixa demanda, similar a das convocatorias anteriores. Así, os bonos dixitais para colectivos vulnerables, que permitían unha redución mensual de ata 20 euros no custe do servizo, recibiron 1.212 solicitudes, das cales xa se concederon 807, que suman un importe de 193.680 euros. Na liña de axudas para dotar de 1G a pemes e micropemes situadas en polígonos recibíronse 6 solicitudes e executouse unha actuación por importe de 16.777 euros. As subvencións de ata o 100% para a adaptar as instalacións de telecomunicacións de edificios anteriores a 2001 non rexistraron ningunha solicitude.
A Xunta lamenTa que o deseño do Programa UNICO, fixado de xeito unilateral polo Goberno central, sen ter en conta as características e necesidades de cada comunidade, impedira acadar un maior número de beneficiarios e reforzar a conectividade onde é realmente necesario.
Isto complica a execución dos programas en tempo e forma, o que xa foi trasladado pola Xunta e as restantes comunidades no marco da Conferencia sectorial para a Transformación dixital do pasado mes de maio para ampliar o prazo e adaptar as actuacións e poder deste xeito executar adecuadamente os proxectos para a mellora da conectividade.